ياطير عقبي كن خاطـرك شايـن=خاطرك شين وغيبتي عنك يوميـن
النقص فيك مبيـن(ن) لـه بوايـن=في لمعة الريشه وفي ناظر العيـن
ياطيـر انـا ويـاك كنـا خدايـن=وبيني وبينك ولف ومعامل(ن) زين
يوم نتخاوى مع وجيـه الضعايـن=ونهمل سبوقك في مناكب خسيرين
ولا شمـال الهضبتيـن القـرايـن=شرقي طلال ومن سواحيق ويميـن
والا عطينـا سـكـة التابـلايـن=ولا قد عطيناها عليهـن حراذيـن
نصبح على طارات شهب المكايـن=بـيـن العراقيـيـن والاردنيـيـن
في خايع(ن) به كن عينـي تعايـن=ربد الحباري به على اربع وثنتيـن
وناخـذ لنـا أيـام بذيـك الدفايـن=ومابين برقع والغـدف والبسيتيـن
ونكسر على ماينحدر من ضوايـن=وناخذ هناك اسبوع ولا اسبوعيـن
وننكف انشاط وسالمين الصخايـن=ولو كان نتعب عدنـا مستريحيـن
قـدام يطلـع للصقـاره زبـايـن=ناس(ن) تحوش القوبعه بأم روحين
ليا روحـو بمشحنـات الخزايـن=مافـي نحاهـم ذوقـوه الامريـن
واليـوم مابينـي وبينـك مـدايـن=انا سعودي وانت جاين من الصيـن
وامـا لقينـا للحبـاري عـوايـن=والا توادعـنـا وداع المحبـيـن
الوقـت ماتاليـه معنـا بـزايـن=والبر في حادور من حين لا حيـن
ادنـاه مليـان(ن) كراتيـن فايـن=واقصاه ضاق وضيقوبه هل الضين
وضاقت مناهج طيبيـن الضغايـن=واللي على المقناص بالطير ضارين
واليوم كان اللـي يحاكيـك مايـن=هذي سبوقك وانتهـض بالجناحيـن
وهاجر مهاجر مبحـرات السفايـن=للصين والا اهبط على ضلع قزوين
لو كان عندي مـا فراقـك بهايـن=حنا عـزاز ولا نهيـن العزيزيـن
خلك تـروح ولا تشـوف الغبايـن=شاملك عفواً مثل عفـو المساجيـن
منذ /01-30-2009, 02:38 AM
.
يـــاطـيـر _ عبدالله بن نايف بن عون
.
العرض العادي
